12/11/2014 10:01:44

Nuk grumbullohet për Francën dhe Italinë, Meha: I zhgënjyer

Mosgrumbullimi në kombëtare për dy ndeshjet e radhës me Francën dhe Italinë ka lënë të surprizuar mesfushorin e Paderbornit, Alban Meha

HermesNews - Mosgrumbullimi në kombëtare për dy ndeshjet e radhës me Francën dhe Italinë ka lënë të surprizuar mesfushorin e Paderbornit, Alban Meha. 28 vjeçari ka folur për gjermanen "Bild" në lidhje me mungesën e ftesës nga ana e Gianni De Biasit duke u shprehur i habitur që nuk do të jetë prezent për dy miqësoret e nëntorit.

"Fakti që nuk jam grumbulluar për dy ndeshjet me Francën dhe Italinë për mua është një zhgënjim. Trajneri më tha, që fillimisht duhet të riaftësohem", ka thënë Meha.



Në mbështetje të lojtarit është rreshtuar dhe trajneri i tij te Paderborn, Andre Breitenreiter, i cili e ka cilësuar vendimin e De Biasit si të çuditshëm: "Katër javë më parë Alban Meha nuk ishte gati për të luajtur. U aktivizua vetëm 12 minuta ndaj Gladbahut, por megjithatë mori ftesë nga përfaqësuesja për ndeshjen që Shqipëria kishte me Danimarkën dhe Serbinë. Tani që ai po luan rregullisht kombëtarja nuk e fton. Këtë nuk e kuptoj".


Meha u grumbullua për herë të parë në kombëtare nga De Biasi në eliminatoret e Botërorit "Brazil 2014" dhe u aktivizua në fitoren 3-1 të 7 shtatorit të vitit 2012 ndaj Qipros. Në total me kuqezinjtë ai ka realizuar 2 gola, një ndaj Maltës e një ndaj Lituanisë, të dy në takime miqësore.

Arbër Meçenovi

Dërgo me email | Stampo artikullin